Waasi wa M23 waingia katika mji mwingine wa mashariki mwa Kongo, wakikaidi wito wa kusitishwa kwa mapigano

CHANZO CHA PICHA,REUTERS

Maelezo ya picha,Wapiganaji wa M23

Waasi wa M23 wanaoungwa mkono na Rwanda waliingia ndani zaidi ya ardhi ya Kongo siku moja baada ya marais wa Kongo na Rwanda kutoa wito wa kusitishwa kwa mapigano mara moja, wakiingia kwenye viunga vya mji wa Walikale mwishoni mwa Jumatano, wakaazi waliambia Reuters.

Milio ya risasi ilikuwa ikilia kutoka karibu na kitongoji cha Nyabangi cha mji huo, alisema mkazi wa Walikale Janvier Kabutwa.

Chanzo cha habari cha jeshi, ambacho hakikutaka jina lake litajwe, kilisema waasi hao walikuwa wakipambana na wanajeshi na wanamgambo wanaoiunga mkono serikali baada ya kuvuka eneo la jeshi nje ya mji huo katika shambulio la kushtukiza.

Walikale, ambayo iko katika eneo lenye utajiri mkubwa wa madini ikiwa ni pamoja na tin, ndio eneo la mbali zaidi la M23 katika kipindi cha maendeleo yake mwaka huu.

Mji huo wenye takriban watu 15,000 upo umbali wa kilomita 125 (maili 80) kaskazini-magharibi mwa mji mkubwa wa Goma mashariki mwa Jamhuri ya Kidemokrasia ya Kongo, ambao waasi waliuteka mwezi Januari, na kuwaweka ndani ya kilomita 400 kutoka Kisangani, mji wa nne kwa ukubwa nchini Kongo.

Kusonga mbele kwa M23 upande wa magharibi kulilazimisha kampuni ya Alphamin Resources wiki iliyopita kusimamisha shughuli katika mgodi wake wa madini ya tin wa Bisie, takriban kilomita 60 kaskazini magharibi mwa mji wa Walikale.

Nchi jirani na mataifa ya kigeni yamekuwa yakiongeza juhudi za kidiplomasia ili kusitisha kile ambacho kwa haraka kimekuwa mzozo mbaya zaidi mashariki mwa Kongo tangu vita vya 1998-2003 ambavyo vilivutia nchi nyingi jirani.

Siku ya Jumanne, Rais wa Kongo Felix Tshisekedi na mwenzake wa Rwanda Paul Kagame walikutana nchini Qatar kwa mazungumzo yao ya kwanza ya moja kwa moja tangu M23 ilipoongeza mashambulizi yake mwezi Januari.

Walitoa taarifa ya pamoja na Qatar iliyotaka kusitishwa kwa mapigano "mara moja na bila masharti".

Umoja wa Mataifa unasema Rwanda inawaunga mkono waasi wanaoongozwa na kabila la Watutsi kwa kutoa silaha na kutuma wanajeshi.

Download/Pakua/Install App ya Abedijr kupitia google crome Bofya Hapa

                               app hii aipatikani google playstore ka sasa hupatikana kwenye wavuti yetu hii